برنامج متكامل للعناية بالبشرة

اولا وقبل كل شيء احب اقول نصيحتي لكل واحده

ربنا انعم علينا بمميزات لا حصر لها

وانعم علينا بمشاكل في جسمنا تكاد تكون معدودة

وكل مشكلة هي تكفير عن ذنب

او تخفيف عن مصيبة

فلازم نحمد ربنا على ما ابتلانا 

ونحمده لانه عافانا مما ابتلى به كثير من الناس

وبدل ما نركز بس على اصلاح مشاكلنا

ليه بننسى نبرز جمالنا 

طبعا لازواجنا اقصد

ايه يعني حبوب او نمش او كلف

اه شكلها وحش ده لو انتي شعرك كحكه وشفايفك

مشققه وعينك دبلانة

اما لو اهتميتي بشعرك

وسرحتيه تسريحه حلوة و دلعتيه

وحطيتي روج وكحل بس حتى

شوفي الاختلاف

بلاش نحط مشاكلنا عقبة لاظهار جمالنا

المميزات تخفي العيوب وتكاد تمحيها

وفي نفس الوقت هنعالج مشاكلنا على اد ما ربنا يقدرنا ونوصل لاحسن حل 

ونعمل اللي علينا لكن من غير احباط

ولا انتحار

ولا كره للحياة

ولا تعقيد

اتمنى منكم التغيير تغيير افكارنا

تغيير طريقتنا في الحياة

بلاش نبص للنصف الفارغ من الكوب وننسى النص المليان

ثانيا بلاش نستخدم وصفات غريبة بجد مفيش حاجه لها مفعول السحر

دايما خلينا في المعروف والمضمون

يمكن الغريب يكون ليه اضرار منعرفاش سواء عاجلا ام اجلا

وطبعا ده بيقابلني كتير

زي نوى التمر المحروق 

واكرر مفيش سحر

ثالثا عدم تداول اي كريم من الصيدليه الا بعد استشارة الصيدلي ما هو واقف اهوه اساليه قبل ما تشتري

وافهمي كويس اللي هيقوله واستفسري عن كل نقطة

واقري النشرة وركزي وشوفي الاحتياطات

رابعا اي حمضيات سواء طبيعيه مثلا ليمون برتقال او صناعيه بلاش خالص خاصة لو البشرة حساسة

ولو خلاص لازم استشيري صيدلي شاطر

شااااااااااااااطر

خامسا الوصفات منتشرة جدا بين المنتديات
وبتنتقل بدون وعي

ولما بتشوفيها كتير بتقولي ده فعاله

وممكن كلام البنت يشجعك

خلي بالك ده كلام منتديات ليس له اي مصادر علمية موثوق فيها

ومن امثلة كده

اشاعة البيتادين للتفتيح

طبعا البيتادين مش للتفتيح ده مضاد للفطريات اللي قد تسبب اسمرار 

طيب لو اصلا مش عندك الفطريات ده

اذن هيقتل البكتيريا النافعه

وهيسبب التهابات واسمرار

شايفين الفرق

شايفين رحنا للاسمرار برجلينا

وفعلا بيجيلي بنات تشتكي ان المنطقة اسمرت بعد استخدام مرهم بيتادين

مثال اخر

الليمون لازالة رائحة العرق والتفتيح لتحت الابط

وفى واحدة عملتها مرة واحدة بس 

وطبعا اتحرقت بدون مبالغه ومكانتش قادرة تحرك دراعها من الالم

و بعد الحرق طبعا اسمرار وعالجت الحرق وبعده الاسمرار

طيب ليه؟؟؟

ناخد بالنا احسن

سادسا البشرة و الشعر والجسم والصحه مربع متساوي الاضلاع

لا يمكن الاستغناء عن اي ضلع فيهم

وكلهم مكملين لبعض

سابعا في وصفات مناسبة للبعض فقط

مثلا زيت جنين القمح للوجه

اد ايه حلو!!!!!!

اد ايه بينقى البشرة!!!!!!!!

اد ايه بيزود سمك الشعر في الوجه

يبقى اصبح اد ايه وحش

مينفعش للمشعرات

سابعا لو قلت وصفات لبكرة لا شعرك ولا بشرتك هتتحسن

بامانه التحسن داخليا وخارجيا مع بعض

لازم نهتم بالغذاء والماء والصحه بوجه عام

ثامنا عمر الوصفة المكلكعه ما هتجيب نتيجه احسن من البسيطة

بالعكس المكلكعه هنكسل نعملها

والاستمراااااااار اهم شيء

المكلكعه فيها محتويات كتير تم خلطها بدون علم مجرد ان كل مكون مفيد

خلاص نخلطهم

وده غلط

لان عند الخلط في تفاعلات منعرفاش

وممكن تضر مع بعضها

وكمان مثلا خلط 

مثلا زيت جنين القمح مع كريم مرطب

طيب هتستفيدي بالزيت ولا الكريم

استحاله هيوصلوا الاتنين لبشرتك

الزيت هيعزل الكريم

والكريم هيضايق الزيت

اذن يمكن عدمهم افضل

ليه نوهم نفسنا ان احنا تمام

مش بكتر الخلطات

وده كانت نصائحي ليكم على السريع وطبعا الكلام مش عايز يخلص

لكن احنا مع بعض 

ان شاء الله

وهقول تفاصيل اكتر في موضوع الدورة التدريبية

 البشرة 

كلمة واحده محتواها كبيييييييييييير اوي

كلمة واحده يتكتب فيها مواضيع ومواضيع

ناخد دورات ونقرا كتب وابحاث ومراجع ومش هتخلص

البشرة مش وصفه ولا اتنين ولا عشرة

ده نظام متكامل 

تغطي جسمنا كله

جسمنا كله بشرة وشوية شعر فوق كده

برنامج تدريبي خطوة بخطوة هنمشيها مع بعض 

كلنا عايزين نكون حلوين

مين مش عايز؟؟

مفيش طبعا

وطبعا من غير ما تقولو انا عارفه انتو عاملين ايه في بشرتكم

اكيد مش هتتخير عن شعركم ضناكم

بس ده بئه مش ضناكم ده مرايتكم قدام الناس هتلمعيها هتظهر صورتك نقيه ونضيفه

هتسيبيها متربه هتظهر صورتك منغبشه ومضلمة وباهته

والفرق بسيط بين الحالتين فوطة وبخة جلانس ووشك هينور على طول

وانا عندي كلام كتير عايزة اقوله افكار بتروح وتيجي في دماغي

قلت انزلهالكم في موضوع واحد علشان تستفيدوا اقصى استفاده

كل يوم وانتي احلى

اللي هقوله يعمل مواضيع كتييييييييير بس انا يهمني انكم تستفيدو من كل اللي هقوله

ممكن اعمل مواضيع كتير بس اضمن منين انكم هتشوفوها كلها

ولو شوفتوها اضمن منين انكم هتنفذوها

واضمن منين انكم نفذتوها صح

ده انا بشوف حاجات بتحصل ووصفات بتتقال غريبة الشكل والمضمون

لكن معايا هنا الوضع مختلف

واللي جرب عارف

انا عايزة تنفيذ واستفادة 

وده اللي حصل في برنامج الشعر 

وان شاء الله هيحصل هنا

هتكلم في كل حاجه 

كل حاجه 

بس واحده واحده 

محدش يسبق الاحداث

وجه 

ايد

رجل

قدم

جسم

كله كله كله

وميكب على خفيف كمان علشان طبعا الميكب مهم جدا لجمالنا

ايوة موضوع واحد بس هقول كل اللي يخطر على بالي

وهتابع كل خطوة بقول عليها معاكم بادق تفاصيلها

خواطر هكتبها في اي وقت افتكرها فيه قبل مانساها تاني

في اي وقت واي يوم

غالبا طبعا كل يوم بس ربنا يهدي النت

و طبعا منتظرة التطبيق والنتيجه اول باول و الاسئله تكون بس في اللي اتكلمنا فيه علشان نركز في خطوة خطوة

ولو مفيش تطبيق مفيش جديد متفقين؟؟؟؟

ويا ريت محدش يتابع من بعيد يا ريت كله يشارك ليه؟؟؟

التفاعل بيشجع اكتر واكتر

اظافر اليدين 

العامل المشترك وبالذات الكالسيوم

وجود نقط بيضا على اظافرك دليل قوي على نقص الكالسيوم في جسمك

ارشادات هامة

انقعي أظافرك النظيفة في وعاء صغير يحتوي على زيت الزيتون. اتركيها مدة 10 دقائق ثم امسحيالزيت الباقي على الأصابع بقطعة قطن.

قومي بذلك مرة في الاسبوع

---اهتمي جدا بكريم اليدين فهو يساعد في الحفاظ على نسبة مرتفعة من الموادالدهنية في أظافرك لا تنسي أن تفركي كل ظفر على حدة بالكريمالمرطب.

---اختاري مانيكير ومزيل المانيكير من نوع جيد ولو نشفاوعي تزوديه بالاسيتون لانه العدو التاني وقللي من استخدامالمانيكير

--- لا تستعملي أظافرك كأدوات

فرشاة تنظيف الاظافر لازم تكون في متناول يديكي كل ما تحسي ان اظافرك مش نضيفه تنضفيها بسرعه

عادة قضم الاظافر

لازم توقفيها فورا لانها تفقدك كل معاني الانوثة

واظافرك يااااااه مش قادرة اتخيل الجلد الطري المتعور يااااه جسمي اقشعر

طيب نبطل ازاي

محلول no habit في الصيدلية

نفس فكرة الفطام

هتدهني منه فكل ما تحطي اظافرك في فمك هتلاقيها مرة فتتنبهي

وطبعا ممكن الصبار الخام زي الفطام بالظبط

نيجي للباديكير

لو عملتي اللي قلته انسي انك تحتاجي باديكير

الباديكير غلط و وبيزود سماكة الجلد حول الاظافر وبيسبب بعض الجروح 

بجد مالوش لازمة

مع العناية المستمرة ده

لازم نفهم كويس جدا جدا

ان العناية بالجسم مترابطة جدا جدا

وان اهم عناية تبدا من الداخل

والحاجات ده هي العامل المشترك بين كل اجزاء جسمنا المسئولة عن ابراز جمالنا:

1 - الغذاء الصحي وبالذات السلطة يوميا

2 - الفيتامينات وموجودة في كل طعامنا ولو في نقص هنكمل بكبسولات

3 - الكالسيوم في اللبن والبيض والكالسيوم مهم جدا للسيدات علشان يعوضوا النقص في الكالسيوم نتيجة الحمل والرضاعه علشان يتجنبوا في المستقبل مشاكل هشاشة العظام

4- الحديد الكبدة واللحمه والعسل الاسود والسبانخ وكل الخضروات ذات الاوراق الخضراء الغامقة

5 - الماء ( 8 اكواب يوميا ) وده مهم جدا لحيوية البشرة والشعر غير تنقيه الجسم من السموم

6 - الصحة بصفة عامة لازم لما نحس باي تعب صحي او الم في مكان معين او اي اختلاف في جسمنا

بسرعة نكشف عند دكتور مختص لان الجسد اذا اشتكى منه عضو تداعى له سائر الاعضاء بالسهر والحمى

علشان كده اول الواحده ما يجيلها برد نلاقي شحوب في الوجه وسقوط في الشعر ايوة مش هتلاحظوا لانه هيقع بعد شهر من الحمى

7 -الرياضة مهمه جدا جدا مش للياقة الجسم بس لا للبشرة والشعر لانها بتنشط الدورة الدموية في كل الجسم وبتساعد على تجديد الحلايا

وهو ده سر جمال الفنانات الحقيقي

اولا العناية باليدين

طبعا اليدين عنوان الانوثة وبجد محدش يستهتر بيهم

بجد اللي هينفذ اللي هقوله يضمن احلى ايدين طبعا مع اختلاف شكل اليد حسب ما ربنا خلق كل واحد لكن احنا بنوصل لاحسن حاجه ربنا انعم علينا بيها

--- البسي دائما قفازين من المطاط عند غسل الاطباق او اي اعمال منزلية لان الماء هوسبب كل المشاكل لليدين والاظافر وكمان المنظفات

---اغسلي يديك بالصابون خمس مرات يوميا وبعدها الترطيب

اهتمي بترطيب يديك باستمرار باستخدام كريم مرطب جليسوليد مثلا وممكن كمان الجلسرينالنقي

---اعملي سنفرة بزيت الزيتون بالسكر وتفركي ايديك الاتنين لمدة خمس دقايق يوميا لمدة اسبوع وبعد ذلكمرتين في الاسبوع

----وما تنسيش افركي ايدك بنص ليمونة يوم بعد يوم

ثالثا الجسم

اهم نظام للعناية بالجسم هو شاور مرة او اتنين يوميا وبعدهم ترطيب هيحل معظم مشاكل الجسم

لان معظم المشاكل بتكون من العرق وبالتالي البكتريا بتسبب حبوب وحساسيه على الجسم

او خطوط بيضا وده من جفاف الجلد والترطيب مهم جدا لتجنب ظهور الخطوط البيضا

وطبعا جفاف الجلد الترطيب هيعالجه تماما ويديكي نعومه الانثى اللي مكنتيش تحلمي بيها

الشعر تحت الجلد بردو من جفاف الجلد والشعرة مش قادرة تخترقه اتراكم الجلد الميت اللي بيكون خشن طبعا

لكن مع النظام ده

انسي كل المشاكل

1- شاور او اتنين يوميا وبعدها ترطيب باي بدي لوشن او كريم او بيبي اويل او جليسوليد

2- مرتين في الاسبوع بعد الشاور ربع ساعه تحت الدش سنفرة بزيت الزيتون مع الملح من تحت لفوق بحركات دائرية

لازالة الجلد الميت ومنع ظهور الشعر تحت الجلد واضفاء نعومة وطراوة على الجلد وتنشيط الدورة الدموية وتجديد خلايا البشرة

مرة في الاسبوع الحمام المغربي

وطبعا نشوف جسمنا ايه مشاكله ونحط برنامج لحلها

مثلا خطوط بيضا اركز على الترطيب بالذات في الاماكن اللي ظهرت فيها

مثلا حبوب اشوف هل هي حساسية اذن كريم للحساسية وطبعا كلهم فيهم كورتيزون ولازم استشارة صيدلي او طبيب

ممكن تكون الحبوب من عدوى بكتيرية اذن كريم مضاد حيوي فيوسيدين كريم مثلا

وطبعا الشاور كل يوم هيقلل المشكلة في الحالتين

شعر ينمو تحت الجلد اذن اركز على السنفرة

احمرار بعد ازالة الشعر اذن اهديه بالنشا ولو مش بيجيب نتيجه يبقى بردو كريم من الصيدليه

حبوب بعد ازالة الشعر اذن كنت محتاجه احط فيوسيدين بعد الازالة

رابعا الركب والكوعين

مشكلة الملايين

مع ان لو بنرطب بس 

مش هيكون في اي اسمرار

طيب مع السنفرة البسيطة بالليفة المغربي او زيت الزيتون والملح

انسي خالص

طيب خلاص انا عندي اسمرار دلوقتي اعمل ايه؟؟

عندك حلين 

الاول تعملي سنفرة يوم ويوم 

والترطيب كل شوية بالجلسرين ودعك الركب والكوعين قبل النوم بنص ليمونة

وان شاء الله هيروح تماما

اما الحل التاني هو التقشير بكريم من الصيدليه وده حل مش بحبه

لكن هو اخر امل

وطبعا ده بيكون بعد فشل المحاولة الاولى 

وهيسبب احمرار وحكة بسبب التقشير

و افضل كريم او مرهم للحاله ده هوDiprosalic 

لكن طبعا ممنوع للحامل والمرضع والاطفال

وعلشان نهدي الالتهاب هنستخدم بيتاديرم بردو فيه كورتيزون

Diprosalic مرتين يوميا ومرتين بيتاديرم

وطبعا هيقشر

وتبقى الركب والاكواع جميلة

ونحافظ عليها بئة بالترطيب

لكن اؤؤكد لازم نحاول الاول بدون تقشير

خامسا الشفايف

اسمرار وتشقق وجلد ميت

اولا بلاش لعق الشفاه لان انزيمات اللعاب مضرة جدا جدا للشفايف

ثانيا ترطيب الشفاة باستمرار لان وجود مرطب او زبدة كاكاو هيقلل من اننا نلعقها بلسانا طبعا

وانا هقولكو على روج حلو جدا هوا اللى هيظبتلنا كل حاجة 

وهنعملة بنفسنا 

ايوا بنفسنا 

هناخد جزء من اى لون روج مش عايزينة عندنا اى لون عاجبنا ونحطه في سلطانيه تتحمل الحرارة ( بيركس او اركوبال )

نضيف جلسرين وفازلين وزيت جنين القمح (غني بفيتامين e ) وزيت خروع ........

اللي عندك اوكي واللي مش عندك مش مهم

نضيف مقدار ربع ملعقة شاي من كل نوع

نحضر حمام مائي في براد او حلة صغيره خالص علشان السلطانيه تكون مثبته على طرفها ومتجريش ويدخل جواها ميه

ده اهم نقطه خلوا بالكم ( التجربة الاولى فشلت مني للسبب ده)

ونقلب والحله على نار هاديه بايد الملعقه الصغيرة لغاية ما تسيح المكونات وتنسجم تماما (حوالي دقيقه لو الماء ساخن )

ونرفعها من النار

ونفضيها في اي علبة صغيرة وفاضيه ونضيفه طبعا مثلا :علبة كريم صغيره جدا

او علبة اي شادو فاضيه او علبة بودر او بلاشر فاضيه

ونسيها تبرد او نحطها خمس دقايق في الفريزر

الجلسرين النقي افضل من الجلسرين بالليمون : بحوالي 4 جنيه 30 مل

والمفروض يكون عندكم كلكم لانه هايل في ترطيب اليدين والقدمين وميزته انه بلا رائحه

زيت جنين القمح :يتراوح سعره في حدود 10 جنيه 30 مل

زيت الخروع :50 مل ب 4 جنيه

فازلين ايفا : علبه صغيره خالص ب 2 جنيه وربع

اما الاسمرار حول الفم

فده بسبب جفاف لجلد بردو ومنطقة حول الفم حساسة وطبعا بتزيد في الشتا

وبسبب ازالة الشعر

ومع الترطيب المستمر وماسكات السنفرة والتفتيح هيروح ان شاء الله

سابعا :الهالات السوداء

الجلد حول العين يكون رقيق جدا

ولذلك العناية به تكون دقيقه جدا

والهالات السوداء حول العينين (أو السواد حول العينين ) لها عدة اسباب :-

1- وراثي. 

2-انخفاض ضغط الدم. 

3- الأنيميا :وذلك لفقد المرأة كمية من دمها كل شهر في دورتها الشهرية وفي حملها وولادتها تفقد كميات أخرى لذلك فهي الأكثر عرضة لفقر الدم وذلك إذا لم تنتبه إلى تعويض فاقد عنصر الحديد من خلال الأغذية الغنية به مثل: الخضر الطازجة، والسبانخ، واللحوم، والكبد، والعسل الأسود، والمكسرات، أو باستعمال أدوية الحديد والفيتامينات.

4- الإجهاد الذهني والعصبي. 

5- انخفاض المعدل اليومي للنوم أو اضطراب مواعيد النوم، وفي هذه الحالة ننصح بتنظيم مواعيد النوم، والإقلال من السهر الدائم بلا داع. 

6- كثرة التعرض للكيمائيات مثل مستحضرات التجميل

نصائحي :

1- عمل صورة دم كاملة. 

2- عرض نفسك على طبيب باطني لقياس الضغط وعرض نتيجة تحليل الدم عليه. 

3- أن لا يقل عدد ساعات نومك عن 8 ساعات يوميا. 

4- عدم تحميل الجسم فوق طاقته من الجهد، ويمكنك أخذ فترة راحة ثم معاودة العمل. 

5- الامتناع عن استخدام مستحضرات التجميل في منطقة أسفل العينين. 

6- عمل كمادات بشرائح الخيار على منطقة الهالات لمدة ساعة يوميا. 

7- حافظي على أعصابك هادئة دائما قدر المستطاع، وتلقي أمورك بصدر رحب، وقولي دائما "علمت أن رزقي لا يأخذه أحد غيري فاطمأن قلبي، وأكثري من الصلاة وقراءة القرآن والدعاء خاصة في أوقات الضيق. 

8 – التقليل من مشاهدة التليفزيون والكمبيوتر

كمادات لتفتيح المناطق الداكنة

1_كمادات من شرائح الخيار الطازج للعينين 

وذلك بتغميض العينين ، ووضع شريحة الخيار فوق كل عين بحيث تلامس الجلد المحيط بالعين مع الاسترخاء لمدة 15 دقيقة.

ومن المناسب جداً أن يجرى عمل هذه الكمادات أثناء الاسترخاء في ماء الحمام أثناء عمل حمامات التجميل .

2_كمادات من عصير الخيار المضاف إليه بضع نقاط من عصير الليمون.

3_كمادات شرائح البطاطس ( كبديل لشرائح الخيار ).

4_كمادات عصير النعناع.. 

6_كمادات شاي دافىء لمدة 10 دقائق تليها كمادات شاي باردة لمدة 5 دقائق.

هالات سوداء تحت العين قبل الحيض أو اثناء الدورة الشهرية :

بعض البنات يرتبط عندهم ظهور الهالات بالحيض وده بيرجع لسوء التغذية والضعف

علشان كده لازم نعوض الفاقد بالفيتامينات والحديد بالذات في الخضار

وتجنب الارهاق والضغط العصبي

طريقة الباديكير

1- اعملي باديكير بالطريقة المعتاده طبعا في البيت انا بطلت اروح كوافيرات خالص كله فيالبيت وعايزاكم تكونوا كده

2- انقعي رجلك في ماء دافي ومعاها شاور جيل او شامبو نصف ساعة وبعدين ادعكي بالحجر او المبرد البلاستيك المسنفر حلو جدا جدا بلاش الحديد وحش جدا جدا وبلاش الموس ارجوكم

3- اعملي سنفره بزيتالزيتون والملح او اي سنفرة عندك للجسم وكمان بالليفة المغربي ممتازة دلكي القدم كويس وبعدين اشطفيها وحطي كريم مرطب بالذات حول الاظافر علشان يطري الجلد الميت

4 - ازيلي الجلد اللي بيكون بين الاظافر والجلد اللي حولها اوعي تستخدمي القصافه بتاعه ازالةالجلد لازم تكوني محترفه علشان متعوريش نفسك

انت بتزيليه بالسن بتاع مبردالاظافر العادي الموضوع بسيط مش محتاج ادوات ولا حاجه خالص انا كل كلامي بسيط علشان يناسب الجميع وبجد انا جربت كل حاجه وبقولكم المفيد 

5 - طبعا ابردي ضوافرك بعد ما تنشفيها كويس نصيحه المبرد الخشب حلو حلو حلووكمان مش غالي

ادعكي اظافرك بالفرشاة

6 - نشفي رجلك كويس حدا وبين الاصابع بالذات

7 - كريم كارباميد ب 3 جنيه ادهني منه والبسي شراب وهو ده اللي هيستمر معاكي كل يوم مرهواحده او مرتين

واللي عندهم جفافاكتر يستعملو خلال اليوم جلسرين نقي او كريم جليسوليد بعد كل وضوء 

لو واظبتي على الترطيب مش هتحتاجي تعملي باديكير تاني ممكنبس بعد الاستحمام بالحجر او السنفرة البلاستيك على خفيف كده

وبسن المبرد تزيلي الجلد الزائد وبس

والنتيجه النهائية باذن الله

من اهم المشاكل هي الرائحة السيئه هنتجنبها بالتنشيف الجيد بعد كل وضوء لازم نخصص فوطة صغيرة للقدم ننشف بيه كويس وبين الاصابع بالذات

وكده القدمين تمام و كمان ممكن تعملي حنه سودا جلوري علىضوافرك وجميييييله موووووت 

كانهامانيكير اسود بالضبط لا ومش بيروح ولا يقشر وكمان بتصلي بيه

ثامنا :العناية بالوجه

بجد مش عارفه اقول ايه واسيب ايه

انا مقدرش اضحك عليكم واقول وصفات

عمر الوصفات ما كانت هي الحل

وهتكلم با ختصار شديد عن الروتين اليومي

1 - تنظيف البشرة مرتين في اليوم اما اصحاب حب الشباب تلات مرات على الاقل

واصحاب البشرة الحساسه يتاكدوا من نوع الغسول انه يكون للبشرة الحساسه او صابونة نابلسي شاهين تنفع بردو

2 - بعد التنظيف نيجي للتونر التونر بيزيل بقايا الصابون وبقايا الاوساخ وبيقفل المسام

وطبعا الانواع كتير جدا وفي انواع للبشرة الحساسة

ونمسح بقطنة وشوفي بنفسك اللي هيطلع في القطنة

3 - ويا سلااااااام لو مررنا تلجه بتنشط الدورة الدموية وتنشط تجديد الخلايا

4- وبعدها طبعا الكريم المرطب

كل واحد حسب نوع بشرته

وطبعا هيكون كريم نهار

و السن بلوك لو خارجين

نختار نوع مناسب لبشرتنا 

البشرة الجافه : milk او cream

البشرة العاديه : cream

البشرة الدهنيه : fluid

وفي المساء كريم ليل بعد نفس الروتين

اما الروتين الاسبوعي

نخصص يومين في الاسبوع لعمل ماسكين بس للبشرة

مثلا الاتنين : ماسك ترمس مطحون مع زبادي

يترك على البشرة حتى يجف ويشطف بماء فاتر مع فرك خفيف وده ماسك سنفرة رااائع

هايل طبعا وبيزيل الجلد الميت وبينقي البشرة من اي عيوب مع الاستمرار

اذن الخميس: ماسك بذرة قطونة

ملعقة صغيرة مملوءة بذرة قطونة + ماء مغلي حوالي اتنين ملعقة

كبيرة

ويقلب كل شوية ولما يبرد هنلاقيه لزج كده عندك اختيارين

تستخدميه كده بحبوبه او تصفيه وتاخدي السائل اللزج

هتصفيه بشاشه او شراب فيليه او قماش خفيف اوي

وتفرديه على الوجه والرقبه ساعه او ساعتين حسب وقتك مع استرخاء تام تام

مهم جدا الاسترخاء لانه بيشد الجلد فلازم يكون الجلد مسترخي

وبعدين تشطفي وجهك بماء فاتر وتمرري تلجه وتنشفي وجهك كويس

وترطيب 

وطبعا اي ماسكين تحدديهم بنفس الطريقة لكن نصيحتي انك متجربيش غير بعد وعي وتدقيق جدا ولما تجربي اي حاجه لاول مرة تخلي المده قليله وتزوديها تدريجيا

ومش هنسى اقول

ماسك التفتيح العظيم

بطاطسية مسلوقة بقشرها بعد غسلها كويس جدا طبعا + 

قشر موزتين نضيفه بردو

+عصير نصف ليمونة او ليمونة حسب 

حساسية البشرة + نصف كوب لبن 

و نضربهم في الخلاط ونحفظهم في زجاجه في التلاجه ليها غطاء محكم

طريقة الاستعمال

يدلك به الوجه لمدة 3 دقائق ويترك حتى يجف حوالي نصف ساعه

اما اصحاب البشرة الحساسه ربع ساعه فقط 

ثم يشطف بماء فاتر

ونمرر تلجه وننشف الوجه جيدا

وترطيب بكريم خفيف

والماسك ده هايل في التفتيح وازالة البقع واي اثار لحب الشباب

المهم الاستمرار

اول اسبوع يوميا وبعد كده

مرتين في الاسبوع

وهو بيعيش في التلاجه عشرة ايام في الشتاء واسبوع في الصيف

وممتاز جدا جدا للجسم بنفس الطريقة

ازالة الشعر

ازالة الشعر موضوع مهم جدا جدا

لانه سبب في بعض المشاكل زي الحبوب والشعر تحت الجلد والالتهابات اللي بتؤدي لاسمرار

علشان كده حبيت اقولكم على الطريقة الصح اللي هتخلينا نتفادى معظم المشاكل ده

من الاخطاء الشائعه ان الشاور بعد السويت والعكس هو الصحيح علشان نطهر جسمنا وبالتالي لما نعمل سويت والمسام تتفتح يكون الجلد نضيف وخالي من اي ضرر علشان ميحصلش التهابات

وبالتالي مفيش حبوب ان شاء الله ولا نقط بني

وده طريقتي الخاصة

لانها اكيد الافضل بعد تجارب عديده

1 – قبل الازالة بتلات ايام ناخد شاور حلو ربع ساعه على الاقل تحت الدش او في البانيو ويفضل صابون ديتول او لايف بوي وبعدين 

سنفرة بزيت الزيتون والملح

وبعدين دعكة خفيفة بالليفه المغربي

وده كله علشان الجلد اللي تحت الجلد يخرج للحياة علشان نشيله تاني بعد تلات ايام ظلم وافترى

طبعا هتقولوا ازاي السنفرة؟؟؟؟؟؟

سلطانية وفيها معلقة كبيرة ملح ناعم 

وعليها ملعقة او اتنين كبار زيت زيتون

وناخد بايدينا وندعك من تحت لفوق سنفرة طبعا بحركات دائرية وده هينشط الدورة الدمويه كمان

من القدمين وحتى الرقبة والوجه طبعا على خفيف

وبعدين ندعك بالليفة المغربي بخفة 

اصحاب البشرة الحساسة 

TAKE CARE

ممكن استبدال الملح بسكر ناعم ( سكر الاسرة ) او خليط من الملح والسكر

وطبعا السنفرة بخفة جدا

2 – خلال التلات ايام قبل الازالة الشاور مستمر يوميا شاور عادي 

وبعده مرطب

3- يوم الازالة شاور حلو عادي جدا ويفضل صابونة ديتول او ليفبوي وطبعا من غير ترطيب

4 – ونبدا الجولة الاولى : في فصل الشتاء

انا شخصيا بستعمل السويت احيانا وغالبا بيكون في الشتا ( لكن لازم تكييف ساخن او دفاية )

ومش بدقق اوي اوي على السريع كده

يعني مفيش حاجه بتكون باينه والدقه غير ضرورية

واحيانا بعد يومين كده اكمل بالسيلك ابيل

طريقة السويت

افرديها كويس في اتجاه الشعر واتركيها عشر ثواني

مهم جدا تتركيها هتشيل كويس جدا

وتشدي بسرعه عكس اتجاه الشعر

وهكذا كل الجسم وطبعا منطقة الابط لازم تكون قطعه جديده ونضيفه من السويت

5- في فصل الصيف : السيلك ابيل هى المنقذ

كل اسبوعين تقريبا لازم ازالة وطبعا نفس الخطوات

والشاور مهم جدا قبلها وممكن سنفرة خفيفه وطبعا السنفرة قبلها بتلات ايام زي ما قلت في البداية اهم نقطة 

وتعقيم السيلك ابيل بقطعة قماش قطنيه مبلله بالكحول الابيض من

الصيدليه

ونبدا الازالة

سريعة ودقيقه جدا ومش بتسيب ولا شعرة

بعمل بيها كل حاجه ماعدا الابط والمنطقه الحساسه اي حاجه تاني

اوكي تمام جدا ولا بتتخن الشعر ولا بتزوده ولا اي حاجة من الاشاعات ده

لكن لازم نكون شادين الجلد كويس علشان منتعورش

وده الانواع الحديثة من سيلك ابيل

هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 970x527 .

6 – ماسك النشا للتهدئة طبعا عارفينه ومحضرينه بماء مغلي معقم قبل الشاور طبعا 

هنفرده على الجسم كله ربع ساعه وبعدين الشاور الخفيف وزيت جونسون للاطفال

7- حالات خاصة بيطلعلها حبوب رغم كل شيء

هنستعمل فيوسيدين كريم تلات مرات يوميا اربع ايام على الاقل

في الاماكن اللي بتظهر فيها الحبوب عادة

8- الظهر والصدر والكتف والاماكن اللي بيكون فيها الشعر خفيف

احيانا بالسيلك ابيل بردو على اد ما اطول 

وممكن جدا كتير بعمل تشقير

العناية بالمنطقه الحساسة والابط (لمنع الاسمرار)

1- تغيير الملابس الداخليه مرتين يوميا على الاقل

2- الاهتمام بالتنشيف الجيد من الامام للخلف

3- الترطيب المستمر بالجلسرين او زيت جونسون للاطفال

4- عدم الافراط في استخدام الغسول او الدش المهبلي (عند الضرورة فقط)

5- سنفرة بزيت الزيتون والملح مرة اسبوعيا او بملح الحليب

6- ارتداء الملابس الداخليه المريحه القطنية 

وفي النهاية

عايزة اقول شوية ملاحظات سريعه

1- بلاش نجرب اي وصفه بالذات لو غريبه

2- البيتادين مش للتفتيح

3- كريمات التفتيح لا تستخدم اكتر من شهرين

4- احذري من وصفات التفتيح اللي فيها كريمات طبيه لانها غالبا تكون مضرة جدا بالذات لانها تكون بدون التحذيرات اللازمة وغالبا ما يدخل فيها كريم كورتيزون واحيانا تقشير

5- لا تشتري اي كريم من الصيدلية دون استشارة الصيدلي الثقة

6- احذري من وضع الزيت على الوجه لانه غير مؤهل وغير معقم من جهة

ومن جهة اخرى لا يصلح للبشرة الدهنية والمختلطة

وايضا يزيد من قوة شعر الوجه

ولسه حالا حالا عضوة كانت بتستغيث لانها وضعت زيت البقدونس فقط بالليل صحيت لقت التهابات وحبوب

7- كلما قللنا من اي شيء نضعه كان افضل لكن نهتم بالترطيب بكريم مناسب وماسكين مناسبين في الاسبوع وبس

وبلاش تجارب

8- لا يوجد ماسك سحري ابدا ابدا ابدا

9- الترطيب والنظافة والصحة والماء حل لمعظم مشاكلنا او كلها

10- لا تستعملي فوطة او مشط او لوفة يستعملها اي فرد غيرك

11- التشقير للوجه او الجسم مواد كيماوية والافضل تجنبه او الاقلال منه قدر الامكان