لسه راجع امبارح من محاضره حضرتها في شركة OLYMPIC GROUP للمحاضر عمر شوقي بعنوان Presentation Skills و عملت تفريغ للمحاضره و قولت لازم اقدمهالكو ، المحاضره تعتبر كورس بصراحه هي استمرت 3 ساعات ، فـ هتبقى طويله علشان كده هحاول اقسمها لحتت صغيره بحيث تقدرو تقروها كلها ، لأنها بجد مفيده جدا ، كمان حاجه الموضوع من كتابتي الشخصيه و ليس نقلا من موضوع اخر و مش موجود في اي حته تانيه على الانترنت ، اخر حاجه ياريت ما تضايقوش من اسلوب كتابتي لأني مش كاتب
هنقسم المحاضره 3 اقسام
التعريف بالمحاضر
بعديها النيه
اهمية ان الواحد يعمل presentation و امثله من اشخاص غيروا العالم
الخطوات اللازمه علشان تعمل presentation قوي مؤثر فعال - و هو دا الكورس بقى -
و في الاخر الخاتمه
و ارجو انكم تستمتعوا و تستفيدو اقصى استفاده
اولا: التعريف بالمحاضر
عمر شوقي خلص دراسة economics في الـ AUC سنة 1996 و بعديها عمل دبلومتين في مجالين مختلفين تماما هما التاريخ: و دا علشان كان بيحب يقرأ في التاريخ جدا و المسرح: و دا علشان هو كان عنده عقده من انه يطلع على مسرح و يتكلم قدام الناس ، فقرر انه يواجه المشكله و قال انا لو عرفت اطلع على المسرح و اتكلم بشخصيه غير شخصيتي يبقى اكيد هعرف اتكلم بشخصيتي ، و فعلا نجح في كده بعد كده اشتغل في البورصه في امريكا فتره من الزمن و حاليا هو شغال مستشار مالي لبعض رجال الاعمال الكبار و المعروفين.
ثانيا: استحضار النيه
و هي تنفيذ لفعل الامر في القران الكريم "اقرأ" ، و علشان دلوقتي موضوع القراءه دا بقى قليل جدا مع رتم الحياه السريع ، فـ احنا بنستعيض عن القراءه دي بحضور الندوات و المحاضرات اللى تنمي مهارتنا في الحياه و اللى نقدر بيها نتشارك خبراتنا و معرفتنا مع بعض و رددنا كلنا الدعاء: "اللهم علمنا ما جهلنا و انفعنا بما علمتنا و زدنا علما"
ثالثا: اهمية ان الواحد يعمل presentation و امثله من اشخاص غيروا العالم.
عرض علينا بعض الصور للأشخاص اللى نقدر نقول عليهم عملو presentation غيرو بيها العالم ، منهم الرئيس الراحل جمال عبد الناصر
ازاي الشخص دا في عز الازمه و النكسه مطلوب منه يطلع يتكلم قدام الشعب و طلع و اتكلم فعلا ، اللى هي الخطبه بتاعت التنحي ، و في اللحظه حول كل غضب الشعب لحب و تعاطف معاه ،
برضه الرئيس الراحل السادات
ازاي بالـ presentation اللى عمله قدر يغير فكر الحرب و يقول ان احنا بدل ما بنحارب نقدر نقعد و نعمل سلام ،
مارتن لوثر كينج
بالـ presentation اللى عمله قدر يغير فكر امريكا كله ناحية العنصريه و الشعب الاسود ، بالظبط قعد ساعه واحده حضرها مليون شخص ، غير فيها فكر امريكا كلها ، و اتقتل بعدها بأربع شهور علشان المحاضره دي ، هو الشخص الوحيد في امريكا اللى عيد ميلاده يعتبر عيد قومي و بتحتفل بيه الدوله كاملة ،
ادولف هتلر
ايا كان الشخص دا احنا بنكرهه بس دا يكفي انك تتفرج على يوتيوب على بعض مقاطع من خطبه و محاضراته اللى كان بيقولها للجيش ، مش شرط انك تكون بتفهم الماني علشان تحس اد ايه الخطبه مؤثره ،
اخيرا و ليس باخر محمد على كلاي
الشخص دا امريكا بعتتله علشان يكون في صفوف الحرب على فايتنام عمل presentation غير فيه فكرة الحرب على فايتنام.
فـ ما بالك الاشخاص دي كانت بتغير دول بأكملها ، مش هتقدر انت تغير رأي المدير بتاعك و انت بتعمل محاضره مثلا او تخلي ابو خطيبتك يوافق عليك لما تيجي تتقدملها ؟؟ ما هي دي كلها صور و اشكال من اشكال ال presentation
يبقى هدفنا من المحاضره دي: هو ازاي نعمل presentation مؤثر و فعال
علشان نعمل محاضره ناجحه لازم نعمل شوية حاجات و هنقسمها على 3 مراحل:
حاجات لازم تتعمل قبل المحاضره
و حاجات لازم تتعمل خلال المحاضره
و حاجات لازم تتعمل بعد المحاضره
و هنخش في كل واحده بالتفصيل...
اول حاجه قبل المحاضره: لازم تعمل 10 حاجات مهمين جدا جدا جدا
1- تبتكر جمله محوريه: بمعنى انك تلخص المحاضره بتاعتك كله في جمله واحده يكون كل حاجه بتدور حوليها ، و دا لزمته انه بيخلي عقول الناس معاك ، او بمعن اخر انت هتقعد تتكلم تتكلم طب وبعدين عايز ايه ؟ ايه الهدف في الاخر ، هتلاقي ناس تاهت منك ، لكن لما تربطهم بجمله واحده هيفضل معاك و يربط كل حاجه بالجمله دي.
2- تعرف المستمعين بتوعك و ايه مدى توقعاتهم من المحاضره دي: يعني تعرف هل كل اللى موجودين فوق سن ال30 ولا لسه في سن الجامعه ، ولا هو خليط بين دول و دول و دي مهمه جدا علشان حاجه هنقولها بعدين ، و تعرف توقعاتهم يعني هما متوقعين يخرجو بايه من المحاضره دي ، متوقعين ايه بالظبط ، طيب لو معرفتش تجيب توقعاتهم تعمل ايه ؟؟؟ تصفر العدادات بمعنى انك في اول المحاضره تقول انتو المفروض تتوقعو كذا كذا و كذا و اوعى تتوقعو انه بعد المحاضره دي هتكون بتعرف تعمل كذا و كذا و كذا علشان كذا و كذا ، يبقى انت كده عملت rest للـ expectations بتاعتهم ، و دي مهمه جدا لما تكون بتقدم حاجه قدام مديرك ، مش هيضايق منك بالعكس هيحس انك بتقدم على الحاجه دي على مستوى بروفيشنال.
3- تحدد الاستايل بتاع المحاضره هل هيبقى فورمال و لا نص نص ولا كاجوال ، هل هيبقى عباره انك بتسأل و الناس بتجاوب ولا انت الوحيد اللى بيتكلم و الناس كلها قاعده بتسمع ولا هيبقى انت جاي ترد على استفسارات الناس بس.
4- تحضر ال presentation بتاعك
5- التدريب... التدريب... التدريب... : اهم حاجه التدريب دا ، لازم تدرب انك تقول المحاضره بتاعتك كذا مره في البيت قبل ما تروح تقولها قدام الناس ، يعني لما تكلم نفسك في البيت و يقولو عليك مجنون احسن ما تتفضح قدام الناس و ما تقولش حاجه ! أهم حاجه التدريب دا.
6- اوعى تلبس حاجه جديده: تلاقي البنات تلبس الحته اللى على الحبل اصل النهارده يوم غير عادي ولزام البس و بتاع و تلاقي الشباب ينزل يجيب جزمه جديده دا غلط غلط جدا كمان ، لأنك مش بتكون مرتاح فيها ، لازم تلبس حاجه مريحه جدا ، لو هتلبس كرافته و هتكون خانقاك اقلعها ، مينفعش ما تبقاش مرتاح ! لو تفتكرو اللعيبه زماااااااان كانو لما يجيبو كوتشيات جديده يدولها للناشئين يلعبو بيها شويه علشان تطرى في رجلهم ، دا قبل كوتشيات اديدس بتاعت دلوقتي دي. و برضه اوعى تلبس حاجه احمر ، برتقالي ، ازرق سماوي ، اصفر برازيلي ، بلااااااااااااااش الالوان دي ، لأنك هتلاقي المستمعين او الحضور قاعدين عينهم مع اللبس ، الالوان دي بشكل غير مقصود بتجذب القرنيه. فـ بلاش الالوان دي.
7-راجع الاعدادات: بمعنى انك قبل ما تروح المكان اللى هتدي فيه المحاضره شوف المكان عامل ازاي ، هل في ميكروفون ولا مفيش الكمبيوتر اللى عندهم بيشغل الحاجه اللى عايز تعرضها ولا لأ هل في سماعات علشان الصوت اللى هتعرضه ولا مفيش هل لو عرضت فيديو الكل هيشوفه ولا لأ ، الناس هتبقى قاعده ازاي دواير ولا كراسي ورا بعض !! هل في مكان هتمشي فيه ولا هتبىقى واقف في مكان واحد !! دي كلها حاجات لازم تعرفها عن المكان قبل ما تروح و مفيش مانع تروح قبلها بيوم تظبط كل الحاجات دي ، ما قدرتش روح قبلها بنص ساعه كفايه اوي علشان تظبط كل حاجه.
8- قابل الناس بابتسامه اول ما تدخل و لو قدرت تسلم عليهم يبقى كويس جداااااا و هقولك ليه : انت لما تروح بدري شويه و تسلم على الموجودين اللى هما بيجو بدري دول كده انت نقدر نقول عملتلك اصحاب في المكان ، فلما تبدأ المحاضره بتاعتك اقعد بصلهم و ابتسم هتلاقيهم بيبادلوك الابتسامه و دي بيكون اثرها جامد جدا عليك بتديك ثقه اكبر و في نفس الوقت بتشد انتباههم معاك اكتر ، في نفس الوقت زي ما في نا كويسه هتلاقي ناس منفسنه تعكنن عليك كل ما تبص لواحد و تلاقيه مكشر او مبوز روح بص لواحد تاني من اللى انت سلمت عليهم في الاول هتلاقيه بيبتسم ، هيرجعلك ثقتك في نفسك تاني ، علشان كده النقطه دي مهمه جدا.
9- الاسترخااااااااااء و ابدأ في معادك: مهم جدا الاسترخاء دا و تقدر تعمله انك اول ما تخش المحاضره تقف كده بتاع 5 ثواني ساكت خالص بتاخد فيهم نفس عمييييييق ، ال 5 ثواني دول هيخلي الناس اللى لسه بتكلم بعضها و اللى بيلعب في تليفونه مستغرب هو ساكت ليه ؟ هو واقف كده ليه ؟ فـ هيخلي في سكون تام في المكان منتظرين انت هتعمل ايه ، و مهم جدا انك تبدأ في معادك، الناس اللى سايبه اللى وراها و جايه تحضر تشوفك هتقول ايه لازم تحترمهم و تبدأ في معادك.
10- الدعاء: ادعي ربنا انه يوفقك و دعاء سيدنا موسى لما دخل على فروعون: "رب اشرحلي صدري ، و يسرلي امري ، و احلل عقدة من لساني يفقهو قولي" قوله 3 مرات في الخمس ثواني اللى هتقفهم ساكت دول و ان شاء الله ربنا هيوفقك.
كده خلصنا اول مرحله و هي ما قبل المحاضره... الحاجات دي كلها هتتعمل قبل ما تبتدي المحاضره بتاعتك.
اخر مرحله و هي الحاجات اللى لازم تعملها بعد ما تخلص ال presentation بتاعك
1- لازم تعمل نهاية تفكر كل الناس باللي قلته ، first impression last and the last imprison
last
2- لازم تفتح مجال للأسئله و الاجابه عليها
3-تسيب الناس تديلك تعليقات على المحاضره ، و ايه اللى استفادوه منها و اكتر حاجه عجبتهم كانت ايه
4- تشكر الحضور انهم اقتطعو من وقتهم و جم يسمعو اللى انت بتقوله.
و بكده تكون المحاضره انتهت مع تمنياتي ليكم كلكم ب presentations رائعه و مؤثره
افتكر دايما
1- قبل و خلال و بعد (المراحل التلاته)
2- التدريب... التدريب... التدريب...
3- الدعاء: "رب اشرحلي صدري و يسرلي امري و احلل عقدة من لساني يفقهو قولي"
4- الجمله الافتتاحيه اللى تشد انتباه الجميع حوليك
5-الاسترخاء و ال5 ثواني اللى اتكلمنا عليهم
6- النهايه اللى تفكر بكل حاجه قلتها
7- الملخص اللى فيه كل حاجه بالمختصر المفيد
8- دائما و ابدا احترم الحضور
نخش على تاني مرحله و هي الخاصه بالحاجات اللى لازم تعملها خلال المحاضره ، و المرحله دي متقسمه 3 اجزاء
اول جزء هو شكل ال presentation هيبقى عامل ازاي ،
تاني جزء و هو المضمون و ازاي تقدمه للناس ،
تالت جزء و هو الاستايل بتاعك انت كمقدم للـ presentation دا .
و في كل حته هناخد مثال مهم و مؤثر علشان ما ننساش و في نفس الوقت نطبق اللى اتكلمنا عليه.
اول حاجه هي شكل ال presentation :
1- لازم يكون في outline او خطوط عريضه انت بتتكلم حوليها يعني لو تلاحضو هنا ايه هي الخطوط العريضه اللى احنا بنتكلم حوليها ؟ هما ال3 مراحل قبل و خلال و بعد ال presentation .
2- الادوات اللى هتستخدمها : هل هتستخدم power point ولا فيديو ولا ايه بالظبط ؟
3- خلي دايما الحاجه اللى بتعرضها تبقى نقط بسيطه و صغيره ، او بمعنى اصح تكون زي ملاحظات ليك تفكرك باللى هتقوله ، ما تكتبش كلام كتييير ، علشان ما تبعدش انتباه الناس عنك ، او كنت تبعتهلهم و تخليهم يقروه و خلاص ايه لزمتها انك واقف بتقوله بقى ؟ و في قاعده لذيذه جدا بتقول six by six يعني تعمل في كل صفحه 6 نقاط بحد اقصى 6 كلمات في النقطه الواحده ، دا هيخلي الخط كبير و واضح و بسيط على اد ما تقدر !
4- ال headings : خليها كلها نفس الشكل ، مش تخلي واحد احمر و التاني اخضر و الخط هنا بولد و في حته تانيه اتاليك ، كده هتخلي الشكل العام مش كويس خالص.
5- طريقة التنقل بين صفحه و التانيه: ال power point في انيميشن كتييييير جدا و اصوات بقى و حركات و بتاع ، اوعى تستخدمها ، انت مش رايح تستعرض عضلاتك في كيفية استخدام ال power point انت رايح الناس تسمعك هتقول ايه.
6- خليه دايما بسيييط و واضح للناس كلها.
هناخد مثال علشان الناس ما تنساش احنا بنتكلم عن ايه و افضل مثال بصراحه هو الزيرو الفظيع اللى اخدناه لما كنا في التصفيات بتاعت استضافة كاس العالم. كنا 3 دول: المغرب و احنا و جنوب افريقيا تقريبا ، هنعمل مقارنه بين اللى المغرب عملته و اللى احنا عملناه ، مش بنتكلم في مضمون دلوقتي و مين عنده استادات اكتر و مستشفيات . لا احنا بنتكلم على طريقة عرض كل واحد ، المغرب جابت افضل لاعب كان بيليه تقريبا و رجل اعمال مشهور جدا و رئيس دوله كل واحد طالع و معاه في ايده صندوق كأنه صندوق مليان دهب و كل واحد معاه المفتاح بتاعه، بيليه فتح الصندوق بتاعه و اتكلم عن الكوره في المغرب و كده ، رجل الاعمال اتكلم عن اقتصاد المغرب ، و رئيس الدوله كان بتاع اسبانيا تقريبا اتكلم عن المغرب و علاقتها بدول الاتحاد الاوروبي و كده ، كل واحد اتكلم في جزء معين و في الاخر عرضو فيديو صغير كده عن المغرب و اللى فيها.... احنا لما طلعنا جبنا وزير الشباب و الرياضه و ولد عنده بتاع 18 سنه و رئيس اتحاد الكوره تقريبا و لو تلاحظوا احنا البلد الوحيده اللى قدمت نفسها على power point مفيش دوله تانيه عملت كده على فكره و المشكله الاكبر انه كان كل slide بشكل مختلف مره هنا بولد مره هنا خلفيه مختلفه و كلهم لما طلعو اتكلمو عن مصر و التاريخ و الفراعنه مصر و التاريخ و الفراعنه مصر و التاريخ و الفراعنه و اللى يزيد و يغطي انهم حاطين صور ملهاش علاقه اصلا باللى بيتكلمو فيه في حين ان هما بيتكلم تلاقي صوره للسد العالي و في اخر ال presentation كانو جايبين صوره للضباط الاحرار !!!!!!!!!!!! ايه علاقتهم بالكلام اللى انتو قلتوه ؟ او ايه علاقتهم بالموقف اللى انتو فيه دلوقتي ، بصراحه احنا استحقينا الزيرو عن جداااااااره. جنوب افريقيا فازت بفرق صوت !!! يعني يمكن كأمكانيات هي متفوقه عن المغرب و كل حاجه بس طريقة عرض المغرب شدت الاصوات ناحيتها ، و علشان كده هي دي اهمية ان احنا نعمل presentation فعال و مؤثر.
تاني حاجه و هي المضمون و ازاي تقدمه للناس:
1- لازم تعمل effective opening : مهمه جدا و اهميتها تكمن في 4 حاجات
1- تجذب بيها انتباه الحضور
2- تدي بيها زي تلميح عن الاستايل بتاع ال presentation
3- دي بتخلي الناس بدل ما هي قاعده متنشنه ، تفك بقى و تبدأ تسمع انت هتقول ايه.
4- و في نفس الوقت تعتبر مقدمه للموضوع بتاعك.
2- لازم تعمل setting expectation و اتكلمنا عليها في الاول علشان ما تبقاش الناس قاعدين فاكرين انك المفروض هتتكلم في كذا و مستنين انك تتكلم فيه و مش مركزين معاك خالص / طب هو هيقول امتى كذا / و تخلص المحاضره ، / ايه دا ، دا ما اتكلمش في الحته الفلانيه / علشان كده لازم توضح للناس انتو المفروض تطلعو من المحاضره دي بالنتيجه الفلانيه. و تعملها ازاي ؟ عن طريق 5 خطوات:
1- تعرف نفسك
2- الهدف من المحاضره ايه؟
3- الاجنده بتاعت اليوم. هنعمل كذا و بعدين كذا
4- هنستخدم ايه ؟ هل هنعرض فيديو ولا انا هتكلم بس او كده
5- تعرفهم على اي اساس يقدرو يقيمو المحاضر بتاعتك.
3- اخر حاجه هي المضمون بتاعك تقدمه ازاي و دا لازم يكون متوفر فيه 4 حاجات:
1- المقدمه و دي لازم يكون فيها الجمله المحوريه اللى اتكلمنا عليها في الاول خالص
2- كوبري: مهم جدا، لأنك بيه بتنقل الناس من الجمله المحوريه اللى شدت انتباه الناس كلها للموضوع الاساسي بتاعك و هناخد عليها مثال حلو اوي
3- الموضوع الاساسي و تدعمه بالحقائق و الصور
4- الخاتمه و دي تقول فيها ملخص للموضوع كله و تشوف الناس استفادت ايه بالظبط.
ناخد مثال حلو اوي على الحته دي و هو مثال قصة سيدنا سليمان و الهدهد.
قال الله تعالى: " وَتَفَقَّدَ الطَّيْرَ فَقَالَ مَا لِيَ لا أَرَى الْهُدْهُدَ أَمْ كَانَ مِنَ الْغَائِبِينَ (20) لَأُعَذِّبَنَّهُ عَذَأباً شَدِيداً أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُبِينٍ (21) فَمَكَثَ غَيْرَ بَعِيدٍ فَقَالَ أَحَطْتُ بِمَا لَمْ تُحِطْ بِهِ وَجِئْتُكَ مِنْ سَبَأٍ بِنَبَأٍ يَقِينٍ (22) إِنِّي وَجَدْتُ امْرَأَةً تَمْلِكُهُمْ وَأُوتِيَتْ مِنْ كُلِّ شَيْءٍ وَلَهَا عَرْشٌ عَظِيمٌ (23) وَجَدْتُهَا وَقَوْمَهَا يَسْجُدُونَ لِلشَّمْسِ مِنْ دُونِ اللَّهِ وَزَيَّنَ لَهُمُ الشَّيْطَانُ أَعْمَالَهُمْ فَصَدَّهُمْ عَنِ السَّبِيلِ فَهُمْ لا يَهْتَدُونَ (24) أَلَّا يَسْجُدُوا لِلَّهِ الَّذِي يُخْرِجُ الْخَبْءَ فِي السَّمَأوَاتِ وَالْأَرْضِ وَيَعْلَمُ مَا تُخْفُونَ وَمَا تُعْلِنُونَ (25) اللَّهُ لا إِلَهَ إِلَّا هُوَ رَبُّ الْعَرْشِ الْعَظِيم (26)"
تعالو بقى نشوف مع بعض ، الهدهد المفروض انه هيروح يعمل presentation قدام سيدنا سليمان اللى هو مستحلفله انه يعذبه او يدبحه / يعني تخيل كده !!! نشوف الهدهد عمل ايه ، اول حاجه "فمكث غير بعيد" يعني راح قرب من سيدنا سليمان ما وقفش بعيد و زي ما احنا عارفين سيدنا سليمان لما كان بيبقى في مجلس بيبقى حوليه مستشاريه من الجن و الانس فـ الهدهد دخل و قرب على سيدنا سليمان. لو تلاحظو هنا هو عمل ايه ؟؟ نفذ اول حاجه اتكلمان عليها موضوع ال5 ثواني اللى تقفهم ساكت و دي خلت الكل يستنى يشوف الهدهد دا هيقول ايه. اول حاجه قالها "احط بمالم تحط به" يعني انا اعرف حاجه انت ما تعرفهاش ، يانهار ابيض ؟ عمل ايه هنا ؟ الجمله الافتتاحيه اللى تشد انتباه اللى واقف قدامك و بعدين "و جئتك من سبأ بنبأ يقين" و انا مكنتش بلعب لا ، انا جاي من سبأ بالخبر التمام ، ايه اللى هو عمله ؟ دا الكوبري اللى اتكلمنا عليه. بعديها دخل بقى في الموضوع اللى عايز يتكلم فيه انا لقيت كذا و كذا تمام و لو تلاحظو هو قال في النص ايه؟ "و اوتيت من كل شئ و لها عرش عظيم" و بعديها نيجي بقى للخاتمه و يقول فيها انه ما انبهرش بالعرش العظيم اللى شافه دا هو اللى مضايقه "الا يسجدو لله الذي يخرج الخبأ في السماوات و الارض" يعني سبحان الله ، الهدهد عرف منين ال structure المظبوط علشان يعمل تقديم لحاجه زي كده ؟ كان ناجح مش كده ؟؟؟؟
تالت حاجه و اخر حاجه في المرحله التانيه اللى هي خلال ال presentation هي الاستايل بتاعك انت و هنحطهم في نقط كده ورا بعض:
1- لازم تكون مبسوط ، حتى لو عندك مشاكل الدنيا ، الناس دي ملهاش ذنب انك تكشر في وشهم
2- لازم تكون في وقتك ،و الناس جايه تسمعك يبقى من غير اللائق انك تأخرهم او ما تبدأش في وقتك
3- لازم تستخدم لغة الجسد و دي نقطه مهمه جدا جدا ، حاول دايما تتحرك تبص للناس تبتسم استعمل ايدك و نظراتك في انك توصل المعلومه اللى عايز تقولها ، ما ينفعش تقف ثابت او تكون حاطط ايدك في جيبك و انت بتتكلم
4- خلي الحضور يشترك معاك في المناقشه و الاسئله و الاجابه ، بس في نفس الوقت تبقى انت اللى ماسك زمام الامور بحيث ان الموضوع ما يفلتش منك
5- نبرة صوتك ما ينفعش تبقى ثابته طول الوقت، لازم تعلى و توطى على حسب الموقف و الكلام اللى بتقوله و لو عايزين تعرفو اكتر بتكلم على ايه ، اسمعو اي مقطع لتلاوة القران الكريم الشيخ محمد جبريل
6- لازم تكون متحمس للي بتقوله ، ما ينفعش تكون بتتكلم مثلا عن الحماس و انت خملان !!!!!
7- توصل المعلومه للناس/ و دي ممكن تعملها خلال 4 حاجات
1- يا اما عن طريق notes
2- او تحفظ اللى انت هتقوله (مش بتحبذ الطريقه دي)
3- او عن طريق انك تتدرب كويس و تعمل notes بسيطه
4- او حاجه اسمها spur of the moment و دي مرحله متقدمه جدا للناس اللى هما بالفطره اصلا متكلمين ، دا شخص بتقوله قوم اتكلم نص ساعه في الناس يقوم يتكلم من غير notes و من غير اي حاجه و يكون فعال كمان.
كده احنا خلصنا المرحله التانيه و هي الحاجات اللى لازم تعملها او تحافظ عليها و انت بتعمل ال presentation بتاعك.
