كنتُ فى سهرة مع الأصدقاء إمتدت إلى وقت متأخر من الليل...وفى نهايتها ودع بعضُنا البعض وفى أثناء رجوعى إلى المنزل وفى إحدى المُنحنيات وجدتنى وجهاً لوجه أمام كلب كبير ...وقفت... وهو أيضاً
أنظر إليه... وهو أيضاً.... ودار هذا الحديث (الأخوى) بينى وبين نفسى
- ترى ماأرى؟
- نعم كلب من أكبر المقاسات
- طيب وماالعمل؟
- أنا بقول _نطنشه_ ونمضى فى طريقنا
- طيب وتفتكر حضرتك هو هيطنشنا؟
- هيعمل إيه يعنى؟
- هيعض حضرتك... انت عارف كام إنسان بيموت سنوياً من عضة الكلب؟
- عارف (55000) حسب تقرير الصحة العالمية
- وبحضرتك حيبقوا( 55001) وخصوصاً إن 95%منهم من افريقيا وآسيا
- طبعاً يابنى الكلاب فى أوروبا كلها (كانيش) يعنى أكبر سِنْه من أسنان الكلاب دى
نصف سنتيمتر أما هذا فأقل سِنْه ستة سنتيمترات يعنى لوعض ذراعك فكْيهِ سيلتقيان
- تعرف ماذا يحدث لمن يعضه كلب مسعور ولم يبادر بالعلاج؟
- عارف.... الأول بيحس بإرتفاع درجة الحرارة بعد مده يحدث له هياج شديد
ثم يهدأ وتبدأ عضلاته تــُــشل تدريجياً ثم يتوفى....
- أنابقول تعمل زى بطل الفيلم الأمريكى هجم عليه أسد وضع يده فى فم الأسد ومسك فكه العلوى بيده اليمنى وفكه الأسفل بيده اليسرى ومزق الأسد قطعتين
- ياعم دى سينما انت لو حطيت ايدك فى فم هذا الكلب لن تراهم مره أخرى
- طيب ايه رأيك لو تصرخ؟؟
- أصرخ ...دى فضيحه..الرجال والشباب حتى الأطفال فى المنطقه يعتبرونك مثالاً
للجرأه للبطوله والأقدام والجساره
- جرأه.. بطوله.. إقدام ..جساره ......ياعم البنطلون مبلول من الجهه الأماميه
- لا....دا عرق
- لكن ريحته مش عرق
- عرق ....خلص فى الكلام
- سؤال لحضرتك ماذا لو هجم عليك هذا الكلب ؟
- سيعضنى
- جميل...ماذا لو هجمت أنت على هذا الكلب ؟
- سيعضنى
- يعنى النتيجه واحده...إذاً بادر بالهجوم عليه وإذا عضك تتداوى
- ماشى عِد لغاية ثلاثه وسأهجم عليه ...بس ببطء قوى ى ى ى
- ماشى واحد.......اثنين.....ثلاااااااااااااااثه
وهجمت على الكلب فإذا بهِ يفر من أمامى
- هذا درس جديد إذا قابلتك مشكله خذ وقتك...فكر ...ثم إهجم
وكن جريئاً و بطلاً ومقداماً وجسورا
ليست هناك تعليقات:
إرسال تعليق